मुंबई दि.21 जुन – शिवसेनेच्या एकनाथ शिंदे (Eknath Shinde) यांच्या नाराजीनाट्यामुळे महाराष्ट्रात राजकीय भूकंप आला आहे. एकनाथ शिंदे यांच्यासह 12 ते 15 आमदार नॉटरिचेबल असून ते गुजरातमध्ये ( Gujrat ) असल्याचे बोलले जात आहे. तर शिवसेनेकडून मात्र पहिली प्रतिक्रिया आली असून शिंदे लवकरच शिवसेनेच्या गोटात असतील असे सांगण्यात आले आहे.
शिवसेना ( Shiv Sena ) या आमदारांशी संपर्क करण्याच्या प्रयत्नात असताना आणखी एक मोठी बातमी समोर येत आहे. शिवसेनेचे आणखी नऊ आमदार गुजरातकडे रवाना झाले असून अगदी काही वेळातच ते सूरतमध्ये पोहचणार असल्याची सूत्रांची माहिती आहे. एकनाथ शिंदे नॉटरिचेबल असल्याने शिवसेनेत प्रचंड अस्वस्थता पसरली आहे. शिंदे यांच्यासह 13 आमदार बंड करण्याच्या तयारीत असल्याचं सांगण्यात येत आहे.
पक्षातील नाराज आमदारांसह एकनाथ शिंदे हे गुजरातमध्ये गेले असून तिथे गुजरात सरकारच्या सुरक्षेखाली हॉटेल मेरिडियनमध्ये ( Hotel Meridian ) मुक्कामी आहेत. या गायब आमदारांशी संपर्क साधण्याचा प्रयत्न सातत्याने पक्षाकडून होत आहे. मात्र, त्यात अद्याप यश आलं नसून शिवसेनेची चिंता वाढवणारी आणखी एक माहिती समोर येत आहे. शिवेसेनेचे आणखी नऊ आमदार बंडखोरीच्या तयारीत असून ते एकनाथ शिंदे मुक्कामी असलेल्या हॉटेलमध्ये पोहोचत आहेत. रस्ते मार्गाने हे आमदार सूरतमधील हॉटेलमध्ये पोहोचत असल्याचं समोर आलं आहे.
कोणते आमदार आहेत सहभागी ?
आत्तापर्यंत समोर आलेल्या माहितीनुसार, पालघरचे आमदार श्रीनिवास वनगा, अलिबागचे आमदार महेंद्र दळवी, भिवंडी ग्रामीणचे आमदार शांताराम मोरे, मुंबईतील प्रकाश सुर्वे, तानाजी सावंत हे आमदार गायब असल्याचे समोर आलं आहे.
शिवसेनेने बोलावली तातडीची बैठक
विधानपरिषद निवडणुकांचे मतदान पार पडल्यानंतर मुख्यमंत्री उद्धव ठाकरे यांनी मध्यरात्री 12.30 वाजता वर्षा बंगल्यावर आमदारांची बैठक घेतली होती. मात्र, या बैठकीसाठी शिवसेनेचे 13 आमदार गैरहजर होते. पक्षाकडून या आमदारांना वारंवार संपर्क करण्यात येत होता. त्यानंतर आज सकाळी पुन्हा आमदारांना बोलावणं धाडलं आहे. या बैठकीला तरी आमदार उपस्थित राहणार हे पाहणं महत्त्वाचं ठरणार आहे. दरम्यान, एकनाथ शिंदे नॉट रिचेबल असण्याने शिवसेनेतील अंतर्गंत कलह चव्हाट्यावर आला असल्याची चर्चा सुरू आहे.
( Political earthquake in Maharashtra; Thackeray government in crisis, Eknath Shinde’s support to Shiv Sena. )