वाहून गेलेली बस सापडली… अतिधाडसी चालकासह चौघांचा मृत्यू.

यवतमाळ दि.29 सप्टेंबर – काल (दि.28) सकाळी आठ वाजण्याच्या सुमारास मुसळधार पावसात यवतमाळमधील उमरखेडच्या दहागावात एसटी बस (ST Bus) नाल्याच्या पाण्यात वाहून गेल्याची दुर्दैवी घटना घडली होती. ती बस आज गाळात सापडली असून बस पासून दिड किमी अंतरावर चालकाचा मृतदेह आढळून आला. या घटनेत चौघांचा मृत्यू झाला आहे.

(Flooded bus found … Four killed, including driver.)

काल सकाळी आठ वाजण्याच्या सुमारास नागपूरहून नांदेडकडे जाणाऱ्या (MH 14 BT 5018) या एसटीच्या हिरकणी बसचा अपघात (Accident) झाला होता. यवतमाळ जिल्ह्यातील उमरखेड शहरापासून काही अंतरावरील दहागाव नाल्यावर ही दुर्घटना घडली. दरम्यान, या अपघातात 2 प्रवाशांना वाचवण्यात यश आलं होतं तर कालच तिघांचे मृतदेह हाती लागले होते. यातील चालकाचा शोध सुरू होता.

गाळात फसलेली बस आज नाल्यातून काढण्यात यश आले आहे. एसटी बस मधील बेपत्ता असलेला एक मृतदेह नाल्यापासून दीड किलोमीटर अंतरावर बचाव पथकाला आढळला. सदरचा मृतदेह (Dead Body) हा बस चालकाचा असल्याची माहिती आहे. या दुर्घटनेत काल तीन व्यक्ती मृत झाल्या होत्या. यातील दोन व्यक्तींना वाचविण्यात बचाव पथकाला (Rescue squad) यश आले होते. काल आलेल्या मुसळधार पावसामुळे रात्री बचाव कार्य थांबले होते. आज सकाळपासून पुन्हा शोध मोहीम सुरू केले होती.

ज्या प्रवाशांचा मृत्यू झाला त्याची सरकार जबाबदारी घेईल. कोणत्याही प्रकारचा धोका पत्करून पाण्यात बस घालू नये, अशा वाहन चालकांना सक्त सूचना देण्यात येतील आणि यामध्ये चूक कोणाची आहे याची चौकशी केली जाईल, असे आश्वासन राज्यमंत्री सतेज पाटील (Satej Patil) यांनी दिले होते.

नदीवरुन पाणी वाहत असताना एसटी बस चालकाने नको ते धाडस करत प्रवाशांचा जीव धोक्यात घातला. या पुलावरुन पाणी वाहून जात असतानाही चालकाने त्या पाण्यातून गाडी नेली आणि पाण्याच्या प्रवाहात ही बस वाहून गेली. या अपघाताचे दोन व्हिडीओ समोर आले होते. एका व्हिडीओत एसटी बस थेट पाण्यात वाहून जात असताना दिसत आहे. तर दुसऱ्या व्हिडीओत बसमधील प्रवासी आपले प्राण वाचवण्यासाठी धडपड करत असताना दिसत आहेत. बसच्या टपावर अडकलेले प्रवासी मदतीसाठी हाक देत असल्याचं व्हिडीओत दिसून आलं होतं. या एसटी बसमध्ये 2 कर्मचारी व 4 प्रवाशी होते.