मुंबई दि.8 सप्टेंबर – देशभरात कोरोना रुग्णांची संख्या कमी होत असली तरी तिसऱ्या लाटेची शक्यता चिंता वाढवाणारी आहे. राज्यात अजूनही 5 जिल्ह्यात एकूण रुग्णसंख्येच्या 70 टक्के रुग्ण आढळत असल्याने खबरदारी घेतली जात आहे. याच पार्श्वभूमीवर राज्य शासनाने गणेशोत्सवासाठी नवीन नियमावली (Guidelines) जाहिर केली असून गणपती बप्पाचे दर्शन यावर्षीही केवळ अॉनलाईनच घ्यावे लागणार आहे.
(Ganpati Bappa’s only online darshan; Here are the new rules …)
महाराष्ट्रात गणेशोत्सव मोठ्या धुमधडाक्यात साजरा केला जातो. परंतु गेल्या वर्षीपासून कोरोनाच्या संकटामुळे या उत्सवावर निर्बंध (restrictions) आले आहेत. कोरोनाच्या तिसऱ्या लाटेचा (Third wave) धोका लक्षात घेता राज्य सरकारने गणेशोत्सवासाठी नवीन नियमावली जाहीर केली आहे. कोविड-19 (Covid 19) उद्भवलेल्या परिस्थितीचा विचार करता गणेशोत्सव साध्या पद्धतीने साजरा करण्याचा निर्णय घेण्यात आला आहे.
अशी आहे नवीन नियमावली…
सार्वजनिक गणेशोत्सवासाठी (Ganeshotsav 2021) मंडळांनी महापालिका किंवा स्थानिक प्रशासन यांची धोरणानुसार पूर्वपरवानगी घेणे आवश्यक आहे.
कोविड-19 मुळे उद्भवलेल्या संसर्गजन्य परिस्थितीचा विचार करता महापालिका किंवा संबंधित प्रशासनाचे मंडपाबाबतचे धोरण यांच्याशी सुसंगत असे मर्यादित स्वरुपाचे मंडप उभारण्यात यावेत. या वर्षीचा गणेशोत्सव साध्या पद्धतीने साजरा करणे अपेक्षित असून घरगुती आणि सार्वजनिक गणपतींची सजावट करताना त्यात भपकेबाजी नसावी.
1.श्रीगणेशाची मुर्ती सार्वजनिक मंडळाकरिता 4 फूट आणि घरगुती गणपतीकरिता 2 फुटांच्या मर्यादेत असावी.
2.या वर्षी शक्यतो पारंपारिक गणेशमुर्तीऐवजी घरातील धातू संगमरवर आदी मुर्तीचे पूजन करावे, मुर्ती शाडूची पर्यावरणपूरक असल्यास त्याचे विसर्जन शक्यतो घरच्या घरी करावे. विसर्जन घरी करणे शक्य नसल्यास नजिकच्या कृत्रिम विसर्जन स्थळी विसर्जन करण्यात यावे.
3.उत्सवाकरिता वर्गणी/देणगी स्वेच्छेने दिल्यास त्यांचा स्वीकार करावा. जाहिरातींच्या प्रदर्शनामुळे गर्दी आकर्षित होणार नाही असे पहावे. तसेच आरोग्य विषयक व सामाजिक संदेश असलेल्या जाहिराती प्रदर्शित करण्यास पसंती देण्यात यावी.
4.सांस्कृतिक कार्यक्रमांऐवजी आरोग्य विषयक उपक्रम/ शिवीरे (उदा रक्तदान आयोजित करण्यास प्राधान्य देण्यात यावे आणि त्याद्वारे कोरोना, मलेरिया, डेंग्यू इ. आजार आणि त्यांचे प्रतिबंधात्मक उपाय तसेच जनजागृती करण्यात यावी.
5.लागू करण्यात आलेले निर्बंध वेळोवेळी निर्गमित केलेल्या परिपत्रकानुसार इतर निर्बंध कायम राहतील. त्यामध्ये गणेशोत्सवानिमित्त कुठलीही शिथिलता देता येणार नाही.
6.आरती, भजन, किर्तन आणि अन्य धार्मिक कार्यक्रम आयोजित करताना गर्दी होणार नाही याची दक्षता घ्यावी. तसेच ध्वनी प्रदुषणांसंदर्भातील नियमांचे व तरतुदीचे काटेकोरपणे पालन करण्यात यावे
7.श्रींच्या आगमन व विसर्जन मिरवणूका काढण्यात येऊ नयेत. विसर्जनाच्या पारंपारिक पद्धतीत विसर्जनस्थळी होणारी आरती घरीच करुन विसर्जन स्थळी कमीत कमी वेळ थांबावे. लहान मुले आणि ज्येष्ठ नागरिक यांनी सुरक्षेच्या दृष्टीकोनातून विसर्जनस्थळी जाणे टाळावे. संपूर्ण चाळीतील इमारतीतील सर्व घरगुती गणेशमुर्तीच्या विसर्जनाचा मिरवणूक एकत्रितरित्या काढण्यात येऊ नयेत.
मुंबई महापालिकेचे निर्बंध
गणपती आगमनावेळी केवळ 10 लोकांना परवानगी देण्यात आली आहे. घरगुती गणपती आणताना केवळ 5 जणांना परवानगी देण्यात आली आहे. गणेश मंडपात बाप्पाचं दर्शन घेण्यापासून लोकांना बंदी घातली आहे.
मंडळाने गणपतीचं ऑनलाईन (Online) दर्शन उपलब्ध करून द्यावं असं मुंबई महापालिकेने म्हटलं आहे. गर्दी टाळणं आणि सोशल डिस्टेंसिंगचं (Social distance) पालन करण्याचं आवाहन महापालिकेने केले आहे. प्रसिद्ध मंडळांनाच समुद्रात गणपती विसर्जन करण्याची परवानगी आहे. विसर्जनावेळी केवळ 10 लोकांना उपस्थित राहता येईल.
