डिसेंबरमध्ये स्थानिक स्वराज्य संस्थांच्या निवडणुका लागण्याची शक्यता – मंत्री विजय वडेट्टीवार.
औरंगाबाद दि.7 अॉगस्ट – ओबीसींचे राजकीय आरक्षण (OBC reservation) टिकलं पाहिजे, यासाठी राज्य सरकारची भूमिका स्पष्ट आहे. केंद्राकडील तयार असलेला डेटा (Data) मागविण्यासाठी आम्ही पत्रव्यवहार केला. डिसेंबरमध्ये स्थानिक स्वराज्य संस्थांच्या निवडणुका लागण्याची शक्यता आहे. तोपर्यंत हा डाटा मिळावा, त्यादृष्टिने आम्ही काम सुरू केल्याची माहिती मदत व पुर्नवसन मंत्री विजय वडेट्टीवार (Vijay Vadettiwar) यांनी आज (दि.7) औरंगाबाद येथे पत्रकार परिषदेत दिली.
(Local body elections likely in December – Minister Vijay Vadettiwar.)
ओबीसी आरक्षणाच्या विषयावर बोलताना वडेट्टीवार म्हणाले, औरंगाबाद (Aurangabad) जिल्‍ह्यातील ग्रामपंचायतीपासून, सेवा सहकारी सोसायटी पासून ते मनपा, नगरपालिका, जिल्हा परिषदेपर्यंत जवळपास 40 हजार जागा ओबीसींच्या वाट्याच्या आहेत. घटनेने हा अधिकार दिलेला आहे, तो मिळवण्यासाठी आमचे प्रयत्न सुरू आहेत. ओबीसींचे राजकीय आरक्षण टिकलं पाहिजे, यासाठी सरकारची भूमिका स्पष्ट आहे. केंद्राकडील तयार असलेला डेटा मागविण्यासाठी आम्ही पत्रव्यवहार केला.
पुढे बोलताना वडेट्टीवार यांनी माजी मुख्यमंत्री देवेंद्र फडणवीस(Devendra Fadanvis), पंकजा मुंडे (Pankaja Munde) यांनीही केंद्राशी पत्रव्यवहार केलेला असल्याचे सांगितले. हा डेटा मिळवण्यासाठी आताच्या व मागील सरकारने मिळून 9 पत्र केंद्राला पाठविलेली आहेत. परंतू दुदैवाने केंद्राने डेटा दिला नाही. डेटा दिला असता, तर आरक्षण टिकलं असते.
हा डाटा राज्य सरकारला उपलब्ध करून द्यावा, अशी विनंती करणारी याचिका मागील आठवड्यात ज्येष्ठ विधिज्ञ कपिल सिब्बल यांच्यामार्फत सर्वोच्च न्यायालयात दाखल केली आहे. त्याचबरोबर मागासवर्गीय आयोगाचे गठण करून या आयोगाकडे हे काम सोपवले आहे. मागील आठवड्यात या आयोगाचा एक कच्चा ड्राफ्ट शासनाला प्राप्त झाला असल्याचेही त्यांनी सांगितलं आहे.
सर्वोच्च न्यायालयाच्या माध्यमातून केंद्र सरकारकडे विनंती केली आहे. तसेच स्वतंत्र इम्पेरिकल डेटा मिळवण्यासाठी आयोगाच्या माध्यमातून अशा दोन्ही मार्गानी डाटा मिळवण्यासाठीचे प्रयत्न आम्ही सुरू केले आहेत, असेही ते म्हणाले.
आरक्षण ठरविण्याचा अधिकार केंद्राने राज्याला दिला आहे. परंतू 50 टक्क्यांची मर्यादा ओलांडून आरक्षण देता येत नाही. घटना दुरुस्ती केल्याशिवाय आरक्षणात कुणालाही नव्याने समाविष्ट करता येत नाही. केंद्र सरकार या विधेयकाच्या माध्यमातून जबाबदारी ढकलण्याचे काम करत असल्याचा आरोप वडेट्टीवार यांनी यावेळी केला. केंद्राने निर्णय घेण्याचे ठरविल्यास हा प्रश्न एका मिनिटात सुटू शकतो, असेही वडेट्टीवार म्हणाले.
मदत व पुर्नवसन मंत्री विजय वडेट्टीवार यांनी आज घेतलेल्या पत्रकार परिषदेत डिसेंबरमध्ये स्थानिक स्वराज संस्थांच्या निवडणूका (Local body elections) लागण्याचे संकेत दिले आहेत. त्या दृष्टीने ओबीसी आरक्षण वाचवण्यासाठी प्रयत्न सुरु असल्याचे त्यांनी स्पष्ट केले आहे.
