धनंजय मुंडेवर आरोप करणाऱ्या ‘रेणू शर्मा’ हिचा भाजप नेत्यावरही हनी ट्रॅप….
मुंबई: दि.१४- राज्याचे सामाजिक न्यायमंत्री धनंजय मुंडे (Dhananjay Munde) यांच्यावर आरोप करणाऱ्या रेणू शर्मा (Renu Sharma) यांच्यावर भाजपचे नेते कृष्णा हेगडे (Krishna Hegde) यांनी गंभीर आरोप केले आहेत. त्यांनी मुंबई पोलिसांना यासंदर्भात सविस्तर पत्र लिहून माहिती दिली आहे. या पत्रात कृष्णा हेगडे यांनी रेणू शर्मा यांनी मलाही रिलेशनशिपच्या जाळ्यात ओढण्याचा प्रयत्न केल्याचा खळबळजनक आरोप केला आहे. २०१० पासून रेणू शर्मा मला सतत कॉल आणि मेसेज करुन हनी ट्रॅपमध्ये अडकवण्याच्या प्रयत्नात होती असे पत्रात म्हटले आहे.
हेगडे यांनी नकार देऊनही रेणू शर्मा यांनी २०१५ पर्यंत त्रास देत पाळत ठेवल्याचे सांगितले. रेणू शर्मा (Renu Sharma) या मला हनी ट्रॅपमध्ये अडकवण्याच्या प्रयत्नात होत्या. मात्र, मी त्यांना भेटणे टाळले. मात्र, मी बाहेरून केलेल्या चौकशीत रेणू शर्मा यांनी अशाप्रकारे इतर व्यक्तींना फसवल्याची माहिती समजली. मुंबई पोलिसांनी याप्रकरणाची चौकशी करावी, असे कृष्णा हेगडे (Krishna Hegde) यांनी पत्रात म्हटले आहे. विशेष म्हणजे कृष्णा हेगडे यांनी या पत्रामध्ये रेणू शर्मा ज्या फोन नंबरवरुन संपर्क साधायच्या ते क्रमांकही दिले आहेत.अगदी ६ आणि ७ जानेवारी २०२१ रोजीही तिने मला व्हॉट्सअॅप केले. मी थंबचा इमोजी पाठवण्याशिवाय काहीच रिप्लाय दिला नाही” अशी माहिती कृष्णा हेगडे यांनी पत्रात दिली. दोन दिवसांपूर्वी मंत्री धनंजय मुंडे (Dhananjay Munde) यांच्याविरोधात मीडियामध्ये केलेले आरोप वाचून मी थक्क झालो. त्याच वेळी मी रेणू शर्माबद्दल तुम्हाला सांगण्याचा निर्णय घेतला असंही कृष्णा हेगडेंनी सांगितलं. आज त्यांनी धनंजय मुंडेंना टार्गेट केले आहे, काही वर्षांपूर्वी त्या जागी मी असू शकलो असतो, उद्या दुसरं कोणी असेल. ही आमिषाने भुलवणे, हनी ट्रॅप, ब्लॅकमेल आणि खंडणी वसुलीची कार्यपद्धत आहे. मी मुंबई पोलिसांना विनंती करतो, त्यांनी एफआयआर दाखल करुन तार्किक निष्कर्ष काढावा अशी विनंती कृष्णा हेगडेंनी केली आहे.
