मोठी बातमी … मंत्री नवाब मलिकांना 3 मार्चपर्यंत ईडीची कोठडी; मलिक यांच्या अडचणीत वाढ.

मुंबई दि.23 फेब्रुवारी – राज्याचे अल्पसंख्यांक मंत्री नवाब मलिक (Nawab Malik) यांना आज दुपारी पावणे तीन वाजता ईडीने (ED) अटक केल्यानंतर त्यांच्या कोठडीसाठी जोरदार युक्तिवाद झाला. ईडीकडून अतिरिक्त साॅलसिटर जनरल ( Additional Solicitor General ) अनिलसिंग यांनी तर मलिक यांच्याकडून अमित देसाई यांनी किल्ला लढविला. दोन्ही बाजू ऐकल्यानंतर न्यायालयाने नवाब मलिकांना 3 मार्चपर्यंत 8 दिवसांची ईडीची कोठडी सुनावली आहे. यामुळे मलिक यांच्या अडचणीत वाढ झाली आहे.

( Big news … Minister Nawab Malik remanded in ED till March 3; Increase in Malik’s difficulty. )

पहा कसा झाला युक्तीवाद …
मलिक यांनी गँगस्टर दाऊद इब्राहीम (Gangster Dawood Ibrahim) यांची बहीण हसीना पारकरकडून जागा घेतल्याचा मुद्दा ईडीने प्रामुख्याने मांडला. सुमारे 3.30 कोटी रुपयांची जागा मलिक यांनी 55 लाख रुपयांत घेतली. त्यासाठी सलीम पटेल याने मध्यस्थी केली. हा सलीम पटेल मुंबई बाॅम्बस्फोट खटल्यातील (Mumbai bomb blast case) गुन्हेगार होता. ज्यांची ही जमीन होती. त्यांना यातील एक रुपयादेखील मिळाला नाही, अशी मांडणी ईडीने केली. ईडीने यात `टेरर फंडिंग`चा मुद्दा मांडला होता. त्यामुळे मलिक यांना 14 दिवसांची पोलिस कोठडी (Police custody) देण्याची मागणी केली.

कुर्ला परिसरातील गोवावाला कंपांऊड येथील जागा मलिक यांनी गँगस्टर दाऊद इब्राहीम याच्याशी संबंधित व्यक्तींकडून घेतल्याचा दावा ईडीचे वकील अनिलसिंह यांनी केला. दाऊदची बहीण हसीना पारकर हिचा या प्रकरणाशी संबंध असल्याचे अनिलसिंह यांनी सांगितले. तिचा भाऊ इक्बाल याला ईडीने दोन दिवसांपूर्वीच अटक केली आहे. मुनिरा आणि मुरियम यांची ही वडिलोपार्जित मालमत्ता होती. वडिलांच्या निधनानंतर त्यांचीच यावर मालकी होती.

हसीना पारकरशी संबंधित सलीम पटेल याला या मालमत्तेमधील भाडेकरू काढण्याचे अधिकार या दोघांनी दिले होते. पण मालमत्ता विकण्याची पाॅवर ऑफ अॅटर्नी (Power of Attorney) त्याच्याकडे नव्हती. या व्यवहारात 1993 च्या बाॅम्बस्फोटातील दोषी सरदारखान हा सुद्धा सहभागी होता. ही मालमत्ता मलिक यांच्या एका कंपनीला सलीम पटेल मार्फत विकण्यात आली. मूळ मालक असलेल्या मुनिरा यांना एक रुपयाही मिळाला नसल्याचे ईडीकडून सांगण्यात आले. हा संपूर्ण व्यवहार 55 लाख रुपयांचा असल्याची माहिती यावेळी देण्यात आली.

55 लाख रुपये मिळाल्यानंतर हसीना पारकरने (Hasina Parkar) ही मालमत्ता मलिकांकडे हस्तांतरीत केली. या मालमत्तेची किंमत सुमारे साडेतीन कोटी रुपये होती. पण ती 55 लाख रुपयांना खरेदी करण्यात आली. ही मालमत्ता आता त्यांना विकसित करायची आहे. ही मालमत्ता मलिकांना कागदोपत्री विकणारा सलीम पटेल हा हसीना पारकरचा हस्तक होता. या साऱ्या बाबींचा आणखी तपास करायचा असल्याने मलिक यांना 14 दिवसांच्या कोठडीची मागणी ईडीने केली.

मलिक यांचे वकिल अमित देसाई यांनी कोठडीस तीव्र विरोध केला. प्रिव्हेन्शन ऑफ मनी लाँडरिंग (PMLA) हा कठोर कायदा आहे. हा कायदा येण्यापूर्वी सहा वर्षे आधी म्हणजे 1996 मध्ये झालेल्या पाॅवर ऑफ अॅटर्नीचा उल्लेख ईडीकडून केला जात आहे. फौजदारी कायद्यात पूर्वलक्ष्यी प्रभावाने कारवाई करता येत नाही. तुम्ही वीस वर्षांनी जागे व्हाल आणि 14 दिवसांची पोलिस कोठडी मागाल, हे बरोबर नाही. या प्रकरणात गँगस्टर दाऊतविरोधात FIR कोणी पाहिलेला नाही. मलिक यांची दाऊद इब्राहीमशी लिंक असल्याच्या आरोपात तथ्य नाही. महाविकास आघाडीचा नेता राष्ट्रविरोधी कारवायांत सहभागी असल्याचे दाखवून द्यायचे आहे. त्यासाठी हा सारा खटाटोप सुरू आहे, असा युक्तिवाद देसाई यांनी केला.

ज्या सलीम पटेलच्या आधारावर ईडी आरोप करत आहेत. या नावाच्या दोन व्यक्ती आहेत. एक सलीम पटेल याचा मृत्यू झाला आहे आणि दुसरा जिवंत आहे असा युक्तिवाद देसाईंनी केला. एक सलीम पटेल उर्फ फ्रूट आहे, जो छोटा शकिलचा नातेवाईक आहे. मलिक यांनी ज्या सलीम पटेलकडून प्राॅपर्टी विकत घेतली आहे तो वेगळा आहे. नवाब मलिकांना अडकवण्यासाठी हे सारे तयार केले आहे. ईडीने रिमांड रिपोर्टमध्ये एका ठिकाणी नवाब मलिक यांनी प्राॅपर्टी हसीना पारकरकडून विकत घेतली असे म्हटलं आहे.

दुसरीकडे नवाब मलिक यांनी प्राॅपर्टी मुनिराकडून विकत घेतल्याचं लिहिलं आहे. ही दोन्ही वाक्ये कुठेही मेळ खात नाहीत. मुनिराची मालमत्ता सलीम पटेलने चुकीच्या पाॅवर ऑफ अॅटर्नीद्वारे विकल्याचे म्हटले आहे. मग सलीम पटेलविरुद्ध आधी गुन्हा दाखल झाला आहे का, असा सवाल देसाई यांनी विचारला. उलट मग या ठिकाणी मलीक यांचीच फसवणूक झाली आहे. ज्याला अधिकार नव्हते त्याने मालमत्ता मलिक यांना विकली. या ठिकाणी मूळचा गुन्हा कुठे दाखल झाला आहे? तुम्ही (मुनिरा यांनी) सलीम पटेल याला भाडे घेण्याचे अधिकार दिले होते. त्याने ती जमीन विकली. तुम्ही वीस वर्षानंतर जाग्या झाल्या आहात. तुम्हाला गेली 15 वर्षे भाडे मिळाले नाही. तरी तुम्ही काही केले नाही. 2022 मध्ये तुम्ही गुन्हा कोणाविरोधात दाखल करता तर मलिक यांच्याविरोधात. या केसमध्ये इतर कोणावरही गुन्हा अद्याप दाखल झालेला नाही. महत्वाचे म्हणजे हसीना पारकरचा भाऊ इक्बाल कासकरला दुसऱ्या गुन्ह्यात अटक झाली आहे, अशा विसंगती देसाई यांनी न्यायालयाच्या निदर्शनास आणून दिल्या.

हे हिंदी चित्रपटाचे स्क्रिप्ट नाही….न्यायालय आहे`
अमित देसाई यांनी रिमांड रिपोर्टमधील भाषेला जोरदार आक्षेप घेतला. ईडीने `टेरर फंडिंग` (दहशतवादाला मदतीसाठीची रक्कम) असा उल्लेख केला होता. अशा भाषेवर न्यायालयाने निर्बंध आणायला हवेत. तुम्ही पुरावे दाखवा आणि खुशाल त्यांना शिक्षा करा. पण केवळ अशी वाक्ये उच्चारू नका. तुम्ही सकाळी अटक करता आणि संध्याकाळी टेरर फंडिग (Terror funding) म्हणता? हा रिमांड रिपोर्ट म्हणजे हिंदी चित्रपटाचे स्क्रिप्ट आहे काय? हा चित्रपट नाही. हे न्यायालय आहे, असे देसाई यांनी आक्रमकपणे सांगितले.

पीएमएलए (PMLA) हा पूर्वलक्ष्यी प्रभावाने लागू होत नाही, असे अनेक न्यायालयीन निवाड्यांत सांगितले आहे. रिमांड रिपोर्टमध्ये मलिक हे पीएमएलए कायद्यानुसार दोषी असल्याचा उल्लेख होता. `दोषी` या शब्दाला देसाई यांनी आक्षेप घेतला. न्यायालयांत आरोपीचा गुन्हा सिद्ध व्हायला अनेक वर्षे लागतात आणि येथे ईडीचे अधिकारी मलिक हे थेट दोषी म्हणून जाहीर करतात. मलिक हे सातत्याने गेली काही वर्षे निवडून येत आहेत. आपण कोणाला निवडून देत आहोत, हे लोकांना माहीत असते. हा देश नियमांमुळे टिकून राहिला आहे. मलिक यांना अटक करताना सर्व नियमांचे उल्लंघन झाले आहे. ते विद्यमान मंत्री आहेत. त्यांना मागतील ती कागदपत्रे ते देऊ शकतात. त्यांना अटक करून काय उपयोग होणार आहे? दाखल केलेला गुन्हा आणि त्यांचा संबंधही नाही, असा युक्तिवाद देसाई यांनी केला.