देवेंद्र फडणवीस आज एकनाथ खडसे यांच्या घरी; खडसेंच्या पक्षांतरानंतर पहिल्यांदाच दौरा.

जळगाव दि.1 जून – विरोधी पक्षनेते देवेंद्र फडणवीस (Devendra Fadnavis) आज जळगावातील मुक्ताईनगरमध्ये आहेत. ज्येष्ठ नेते आणि माजी मंत्री एकनाथ खडसे (Eknath Khadse) यांनी भाजप (BJP) सोडून राष्ट्रवादी काँग्रेस (NCP) पक्षात प्रवेश केल्यानंतर, देवेंद्र फडणवीस हे प्रथमच खडसेंच्या मतदारसंघात आहेत. महत्त्वाचं म्हणजे देवेंद्र फडणवीस हे आज एकनाथ खडसे यांच्या घरी जाऊन भाजप खासदार रक्षा खडसे (Raksha Khadse) यांची भेट घेतली आहे. दरम्यान, देवेंद्र फडणवीस यांनी आज मुक्ताईनगरमधील ग्रामीण रुग्णलयाची पाहणी केली. याशिवाय वादळ आणि पावसामुळे झालेल्या नुकसानीची त्यांनी पाहणी केली.

(Devendra Fadnavis at Eknath Khadse’s house today; Tour for the first time after Khadse’s transfer.)

जळगाव जिल्ह्यातील भाजपची पडझड बघता पक्षबांधणी संदर्भात ही रक्षा खडसेंसोबत चर्चा होण्याची शक्यता आहे. गेल्या आठवड्यात मुक्ताईनगर पंचायतीमधील भाजपच्या (BJP) आजी माजी दहा नगरसेवकांनी सोडचिठ्ठी देत शिवसेनेत प्रवेश केला होता. त्याबाबत फडणवीस रक्षा खडसे (Raksha Khadse) यांच्याशी चर्चा केली.

यावेळी आमदार गिरीश महाजन (MLA Girish Mahajan), अशोक कांडेलकर, राजेंद्र फडके आदी भाजपचे पदाधिकारी व कार्यकर्ते उपस्थित होते. यावेळी श्री फडणवीस यांनी चहा, नाष्टा केला. तर खासदार रक्षा खडसेंचा मुलगा गुरू व मुलगी क्रिषीकाला श्री. फडणवीसांनी आर्शिवाद दिला.

देवेंद्र फडणवीस यांनी कालच राष्ट्रवादीचे (NCP) अध्यक्ष शरद पवार यांची भेट घेतली होती. प्रकृतीची विचारपूस करण्यासाठी फडणवीस हे पवारांचं निवासस्थान असलेल्या सिल्व्हर ओकवर पोहोचले होते. त्यानंतर आता देवेंद्र फडणवीस यांनी आज सकाळी एकनाथ खडसे (Eknath Khadse) यांच्या घरी भेट दिली आहे.

एकनाथ खडसे यांनी 23 ऑक्टोबर 2020 रोजी भाजपला रामराम ठोकून राष्ट्रवादीत प्रवेश केला होता. त्यावेळी त्यांनी देवेंद्र फडणवीस यांच्यावर तुफानी हल्ला चढवला होता. देवेंद्र फडणवीस यांनीच आपल्याला अतोनात त्रास दिला, अक्षरश: पक्षातून बाहेर पडण्यासाठी भाग पाडलं असा आरोप त्यावेळी एकनाथ खडसे यांनी केला होता.

“काही मिळालं, नाही मिळालं याचं दु:ख नाही, देवेंद्र फडणवीसांनी छळले. मी फक्त फडणवीसांवर नाराज आहे, असं एकनाथ खडसे म्हणाले होते. माझ्यावर विनयभंगाचा गुन्हा दाखल झाला आणि तो देवेंद्र फडणवीसांना गुन्हा दाखल करायला लावला याचा मनस्ताप झाला,” असं खडसे म्हणाले होते.

देवेंद्र फडणवीस शरद पवारांच्या भेटीला
विधानसभेतील विरोधी पक्षनेते आणि माजी मुख्यमंत्री देवेंद्र फडणवीस (Devendra Fadnavis) यांनी आजकाल 31 मे रोजी राष्ट्रवादी काँग्रेसचे नेते शरद पवार (Sharad Pawar) यांची भेट घेतली. पवारांचं निवासस्थान असलेल्या सिल्व्हर ओक इथे जाऊन फडणवीस शरद पवारांना भेटले. स्वत: देवेंद्र फडणवीस यांनी ट्विट करुन याबाबतची माहिती दिली होती.

दरम्यान, एकनाथ खडसे मात्र मुंबईत असल्याची माहिती समोर आली आहे. देवेंद्र फडणवीस यांनी वादळात झालेल्या नुकसानीची पाहणी करत थेट राज्य सरकारवर टिका केली. नुकसानभरपाई भरपाई द्यावी अशी मागणी यावेळी केली.